Einstieg Kids
Mir si vom Chirchgmeindhuus los und si richtig Heimeschwand gange. Ufem Wäg hei der Abraham und der Lot sich müesse trenne, so si d Teenies ar Chrüzig links, d Kids ar Chrüzig rächts gloffe. Mir si när mit verschiedene Pöschte ufem Wäg, wie Teigware schätze, morse, LVS-Suechi usw., ufe Lagerplatz glangt. Mir hei üs ignischtet, u hei no Fuessballgoal und es Volleynetz ufbout. Vorem Znacht het ouno ä Badeaktivität am Bächli stattgfunde, heiss isches nämlech scho gsi…
Mir Lagerfüür, singe und der Andacht hei mir dr Aabä abgschlosse und zum Bettmümpfeli hets no ä Schoggibanane gäh. Chuum im Bett, hets afah rägne.
Einstieg Teens
Nach der Trennig hei mir üs dürds Wachseldornmoos gschlage und hei bim Blockhus im Chrüzwäg gueti Ussichte uf ässä gha. Üsi Mahlzit, het sech du usegstellt, si Grenpacks. Mir hei die aus einzigi Nahrig gha, es het sech niemer chönne drücke. Immerhin heimer öppis chönne ässä.
Nachem Zmittag simer richtig Eriz witer. Ungerwägs isches tüpig gsi, und mir hei no kanadischi Wanderer dörfe verarzte. Im Paradiesli acho, hets scho meh ässä usgseh und mir hei üs üses eigete Ässä chönne verdiene und choche. Aues isch im Survival Modus gsi.
Mir hei üse Schlafplatz imne Stäueli gfunde und si so sicher vorem Gwitter z schärme cho. D Giele hei sich ihre Schlafplatz grad säuber boue im Heu.
Am Morge hets no Zmorge gäh dobe und nach der stiue Zyt isches du nach ere ganze Nacht mit Rägä wieder pünktlech zum Losmarsch tröchener worde, bis es när ganz het ufghört rägne.
Mir si richtig Lagerplatz marschiert und när um die 10:30 de o ufem Lagerplatz acho.
